Buddsoddiad Cynaliadwy mewn Iechyd a Llesiant

Mae Cronfa Ddata ac Efelychwr Gwerth Cymdeithasol (SVDS) Iechyd y Cyhoedd wedi cael ei ddatblygu gan Ganolfan Gydweithredol Sefydliad Iechyd y Byd (WHO) ar Fuddsoddi ar gyfer Iechyd a Llesiant (WHO CC) yn Iechyd Cyhoeddus Cymru. Mae hyn yn rhan o raglen arloesol o waith ac ysgogiad sefydliadol a byd-eang ehangach tuag at gynyddu Gwerth ac Effaith, gan gymhwyso ymagwedd Gwerth Cymdeithasol tuag at ddatblygu ‘Iechyd y Cyhoedd yn Seiliedig ar Werth’ ac Economi Lesiant yng Nghymru a thu hwnt.

Mae hwn yn offeryn arloesol ar gyfer cydgrynhoi, storio a thrin tystioaleth economeg iechyd, sydd ar hyn o bryd yn canolbwyntio ar fethodoleg Elw Cymdeithasol ar Fuddsoddiad (SROI) a’i gymhwyso i iechyd y cyhoedd. Gellir ei ddefnyddio i gipio, meintioli, mesur a modelu Gwerth Cymdeithasol (SROI) rhaglenni iechyd y cyhoedd, gan asesu eu canlyniadau cymdeithasol, economaidd ac amgylcheddol ehangach.

Mae gan yr SVDS ar gyfer iechyd y cyhoedd ddwy brif swyddogaeth:

1) Cronfa ddata, yn storio tystiolaeth economaidd SROI sydd ar gael ac yn berthnasol, fydd yn cael ei diweddaru a’i hymestyn yn barhaus dros amser; ac

2) Offeryn modelu (efelychwr) i alluogi data economaidd ac iechyd y cyhoedd i gael ei drin i efelychu gwasanaethau ac ymyriadau iechyd y cyhoedd a modelu amcangyfrifon SROI, sy’n berthnasol i gyd-destun cenedlaethol, lleol, sefydliadau a rhaglen ac i’r boblogaeth. Bydd hwn yn wasanaeth a ddarperir gan WHO CC i’ch tywys drwy’r broses a bydd cymorth i ddehongli’n rhan o’r swyddogaeth hon.

Mae’r offeryn wedi cael ei lywio gan, a’i ddatblygu mewn cydweithrediad ag arbenigwyr Gwerth Cymdeithasol ac SROI; ymchwilwyr ac economegwyr iechyd; a chydweithwyr ar draws Iechyd Cyhoeddus Cymru, y GIG a Llywodraeth Cymru. Gall ddarparu gwybodaeth hanfodol i helpu i lywio gwneud penderfyniadau iechyd y cyhoedd ac ehangach, blaenoriaethu buddsoddiad a gwella rhaglenni er mwyn cynyddu gwerth am arian a chymorth ar gyfer GIG ac economi fwy cynaliadwy a chydnerth yng Nghymru, gan wneud iechyd a llesiant y boblogaeth yn ganolog.

Mae’r SVDS wedi ei anelu at gydweithwyr yn Iechyd Cyhoeddus Cymru, yn ogystal â rhanddeiliaid a phartneriaid allanol perthnasol (cenedlaethol a rhyngwladol), sydd yn gweithio, neu â diddordeb ym meysydd cyllid iechyd, gwerthuso economaidd, Gwerth Cymdeithasol ac SROI, Gofal Iechyd yn Seiliedig ar Werth, modelu iechyd y cyhoedd, buddsoddi mewn iechyd a llesiant, datblygu economaidd cynaliadwy, cryfhau systemau iechyd (y cyhoedd), ac ati. Mae Canllaw i Ddefnyddwyr manwl wedi cael ei ddatblygu; a bydd gweithdai a hyfforddiant pellach yn cael eu trefnu i gynyddu ymwybyddiaeth, defnyddio cymorth a hyrwyddo cymhwyso ym maes iechyd y cyhoedd.

Mae’r SVDS ar gyfer iechyd y cyhoedd ar gael yma: https://svdspublichealth.methods.co.uk/ (saesneg yn unig) a gallwch wneud cais am fynediad trwy ebostio: [email protected] i gofrestru a derbyn manylion mewngofnodi (cofiwch edrych yn eich ffolder sothach).  

Ydych chi’n gwybod am dystiolaeth SROI allai gael ei hychwanegu i’r SVDS ar gyfer Iechyd y Cyhoedd? Rydym bob amser yn chwilio am astudiaethau SROI i’w hychwanegu i’r gronfa ddata. Os ydych yn ymwybodol o unrhyw waith yr hoffech i ni ei ychwanegu, ebostiwch ni yn [email protected].

Mae Canolfan Gydweithredol Sefydliad Iechyd y Byd (WHO) ar Fuddsoddi ar gyfer Iechyd a Llesiant (WHO CC) yn Iechyd Cyhoeddus Cymru yn datblygu rhaglen waith arloesol, yn cymhwyso ymagwedd Gwerth Cymdeithasol tuag at ddatblygu ‘Iechyd y Cyhoedd yn Seiliedig ar Werth’ ac Economi Lesiant yng Nghymru.

Nod ein gwaith yw:

1. Arloesi a hyrwyddo’r defnydd o ddulliau ac offer Gwerth Cymdeithasol i gipio canlyniadau ac effeithiau holistaidd (cymdeithasol, economaidd ac amgylcheddol) iechyd y cyhoedd.
2. Profi a datblygu methodoleg Elw Cymdeithasol ar Fuddsoddiad (SROI) i asesu gwasanaethau ac ymyriadau iechyd y cyhoedd.
3. Codi ymwybyddiaeth, gwella dealltwriaeth a gwella gweithredu Gwerth Cymdeithasol ac SROI ar draws Iechyd Cyhoeddus Cymru, y GIG, a chyrff cyhoeddus ar draws y DU, yn ogystal â Sefydliadau Iechyd y Cyhoedd a systemau iechyd yn rhyngwladol.
4. Defnyddio arfer gorau, profiad a dysgu cenedlaethol a rhyngwladol i ddatblygu cyfres o adnoddau i lywio a chefnogi Iechyd y Cyhoedd yn Seiliedig ar Werth fel rhan o Ofal Iechyd yn Seiliedig ar Werth yng Nghymru.
5. Helpu i ddatblygu ymagwedd systemau yn seiliedig ar dystiolaeth o Werth Cymdeithasol i gryfhau’r achos dros fuddsoddi yn iechyd a llesiant y boblogaeth, a hwyluso newid cytbwys a chynaliadwy o ran cyllid tuag at ataliaeth sylfaenol ac ymyrraeth gynnar.
6. Archwilio tystiolaeth a chyfleoedd i ddatblygu’r cysyniad, y fethodoleg a chymhwyso Gwerth Cymdeithasol ac SROI mewn bywyd go iawn i wella iechyd a llesiant, a lleihau annhegwch iechyd yng Nghymru a thu hwnt.

Mae WHO CC yn creu portffolio amrywiol ac arloesol o gynnyrch ac offer i gefnogi’r achos dros fuddsoddi yn seiliedig ar gynaliadwyedd, tystiolaeth a gwerth mewn iechyd y cyhoedd a thegwch iechyd.

Gallwch ddysgu mwy am ein gwaith yn y daflen Buddsoddiad Cynaliadwy mewn Iechyd a Llesiant y Boblogaeth: Tuag at Iechyd Cyhoeddus ar sail Gwerth, sy’n rhoi amlinelliad o’r prif gysyniadau, enghreifftiau o gymhwyso, a chyfres o adnoddau i gefnogi cydweithwyr, rhanddeiliaid a phartneriaid i ddatblygu’r agenda hon. Am fwy o wybodaeth, ebostiwch ni yn [email protected]

Mae’r prosiect hwn yn brosiect ar y cyd lefel uchel rhwng Cymru (Iechyd Cyhoeddus Cymru), y Ffindir a WHO (Swyddfa Fenis), sy’n canolbwyntio ar nodi a datblygu polisïau, datrysiadau a dulliau arloesol allweddol, gyda nifer o lesiant, cymdeithasol, economaidd a cyd-fuddion amgylcheddol tuag at adeiladu ‘Economi Llesiant’. Mae hyn yn cynnwys:

• Gosod pobl a’u llesiant yng nghanol polisi a gwneud penderfyniadau, gan alluogi pawb i gyrraedd eu potensial llawn a mwynhau eu hawliau sylfaenol;
• Arddangos natur llesiant y boblogaeth, cynnydd cymdeithasol a thwf economaidd sy’n atgyfnerthu ei gilydd;
• Tynnu sylw at bwysigrwydd buddsoddi mewn polisïau, prosesau a strwythurau effeithiol, effeithlon a theg sy’n sicrhau mynediad teg i wasanaethau cyhoeddus a chyfleoedd llesiant;
• Ymgorffori gwerthoedd cymdeithasol, megis tegwch, cynhwysiant, llesiant a chynaliadwyedd; a defnyddio enillion cymdeithasol ac economaidd ar fuddsoddiad, wrth ddylunio a gweithredu pecynnau adfer ariannol a chymdeithasol COVID-19
• Cryfhau a hyrwyddo rôl arweiniol Cymru, gan agor cyfleoedd cydweithredol, ymchwil a busnes pellach ledled Ewrop ac yn fyd-eang

Prif bwrpas y rhaglen hon yw amcangyfrif cost anghydraddoldeb iechyd a gwerthuso cost-effeithiolrwydd dosbarthu rhaglenni iechyd cyhoeddus yng Nghymru. Nod y rhaglen hon yw cyflawni’r amcanion canlynol:

• Nodi patrwm cymdeithasol gwahanol ddefnydd gwasanaethau iechyd yn GIG Cymru
• I ddadansoddi’r bylchau iechyd ac amlygu penderfynon iechyd sy’n fwyaf dylanwadol
• Amcangyfrif cost anghydraddoldeb iechyd gan ddefnyddio data gofal eilaidd (derbyniadau cleifion mewnol mewn ysbytai, gwasanaethau damweiniau ac achosion brys, gwasanaethau cleifion allanol), data gwasanaethau meddygon teulu gofal sylfaenol, a data gwasanaethau iechyd cymunedol eraill yng Nghymru.
• Ymgorffori defnydd gwasanaeth iechyd hanesyddol a gwybodaeth gost amcangyfrifedig ar Lwyfan Datrys Ecwiti Iechyd Cymru (WHES)
• Gwerthuso cost-effeithiolrwydd dosbarthu gwahanol raglenni iechyd cyhoeddus, gan gynnwys defnyddio technegau modelu dadansoddol penderfyniadau ac efelychu

Prif bwrpas y rhaglen hon yw modelu effaith ffactorau economaidd, gan gynnwys newidiadau diweithdra cysylltiedig COVID-19 ar ganlyniadau iechyd a defnydd gwasanaethau iechyd. Nod y rhaglen hon yw cyflawni’r amcanion canlynol:

• Rhagamcanu canlyniadau economaidd COVID-19 ar Salwch Hirsefydlog yng Nghymru
• Rhagamcanu canlyniadau economaidd COVID-19 ar Ddefnydd Gwasanaeth Iechyd (HSU) yng Nghymru
• Rhagfynegi canlyniadau economaidd COVID-19 ar Drais a Throsedd yng Nghymru
• Amcangyfrif cost COVID-19 o safbwynt y GIG

Mae gwerthuso economaidd yn gymhariaeth o gostau a chanlyniadau ymyriadau gofal iechyd, sy’n mesur effeithlonrwydd economaidd. Mae’r dadansoddiad cost-effeithiolrwydd yn darparu’r gost i system iechyd ar gyfer pob uned effeithiolrwydd y mae’n ei chyflawni trwy raglen gwella ansawdd, tra bod enillion ar fuddsoddiad yn nodi faint o enillion ariannol y gall system iechyd eu cael o bob punt y mae’n ei buddsoddi mewn rhaglen gwella ansawdd. Nod y rhaglen hon yw cyflawni’r amcanion canlynol:

• Gwerthuso cost-effeithiolrwydd a’r enillion ar fuddsoddiad gwahanol raglenni iechyd cyhoeddus mewn cydweithrediad ag arweinydd rhaglenni ar draws cyfarwyddiaethau o fewn Iechyd Cyhoeddus Cymru

Mae’r dystiolaeth a gynhyrchir o waith economeg iechyd yn helpu’r rhai sy’n gwneud penderfyniadau i ddyrannu adnoddau iechyd yn effeithlon ac yn gyfiawnadwy i wahanol raglenni iechyd cyhoeddus yn Iechyd Cyhoeddus Cymru.

Ym mis Ionawr 2024, cyflwynodd tîm Gwerth Cymdeithasol Sefydliad Iechyd y Byd ddosbarth meistr ar-lein ar y cysyniad o werth cymdeithasol a’i gymhwyso i wella dealltwriaeth ac asesiad o werth cyfannol ehangach iechyd y cyhoedd. Mae hyn yn ategu’r gwaith ar Fuddsoddi Cynaliadwy ar gyfer Iechyd a Llesiant.

Amcanion penodol y dosbarth meistr hwn oedd:
• Hyrwyddo pwysigrwydd dal a mesur gwerth ehangach iechyd y cyhoedd.
• Gwella dealltwriaeth o pam mae gwerth a gwerth cymdeithasol yn bwysig trwy gyflwyno’r cyd-destun strategol a pholisi yng Nghymru a thu hwnt.
• Arddangos cymwysiadau ymarferol o sut y gellir dal gwerth cymdeithasol ymyriadau a gwasanaethau iechyd cyhoeddus.

Bu’r dosbarth meistr hefyd yn archwilio sut i fesur gwerth cymdeithasol drwy’r fframwaith Adenillion Cymdeithasol o Fuddsoddi (SROI). Rhoddwyd y fethodoleg hon yn ei chyd-destun trwy dynnu ar astudiaeth sylfaenol yn ymwneud â sgrinio iechyd rhywiol mewn carchar agored yng Nghymru; yn ogystal ag enghreifftiau o adolygiadau llenyddiaeth o ymyriadau iechyd y cyhoedd ar hyd cwrs bywyd; Iechyd meddwl; a gweithgarwch corfforol a maeth.

FIDEO CYFLWYNIAD DOSBARTH MEISTR

DOLEN I SLEIDIAU DOSBARTH MEISTR Dosbarth Meistr Gwerth Cymdeithasol: Mesur gwerth iechyd cyhoeddus – Public Health Network Cymru (rhwydwaithiechydcyhoeddus.cymru)